Hammasiga Merkuriy aybdor

Film astrologiya mavzusini yumor va hayotiy voqealar bilan uygʻunlashtirgan. Tomoshabin mehnat muhitidagi kurashlar, muhabbat borasidagi qiyinchiliklar va shaxsiy oʻsish jarayoniga guvoh boʻladi. Film qahramoni Elif — jurnalistika fakultetini muvaffaqiyat bilan bitirgan. Lekin orzu qilgan ishini topa olmagan qiz. Oxir-oqibat u bir gazetaga astrologiya boʻyicha muallif sifatida ishga joylashadi. Astrologiya borasida hech qanday bilimi boʻlmasa-da, u oʻzini bu sohada sinab koʻradi va kasbini sidqidildan bajarishga harakat qiladi. Bu davrda u karyerasi va muhabbatida ham astrologiyaning yoʻriqlariga amal qilgan holda yoʻl tutadi. Qiziqarli voqealar, kulgili vaziyatlar va hayotdagi turli burilishlar orqali Elif oʻzini topadi, yangi odamlar bilan uchrashadi va toʻgʻri yoʻlni topishga harakat qiladi. Hali ham filmga Merkuriyning nima aloqasi bor deb oʻylayapsizmi? Odamlar hayoti davomida turli masalalarda muammolarga duch kelishadi. Biror narsa oʻxshamasa beixtiyor “Merkuriy aybdor” deyishadi. Shuning uchun ham “hammasiga Merkuriy aybdor” degan iborani hazilomuz tarzda ishlatish ommalashgan.