Travmatologiya markazi

Seuldagi ko'plab shifoxonalar og'ir jarohatlangan bemorlarni qabul qilishdan bosh tortgani, o'z vaqtida tibbiy yordam ko'rsatilmayotgani sababli o'limlar soni ortib boradi. Janubiy Koreya sog'liqni saqlash vaziri bunday inqiroz uning kelajakdagi siyosiy rejalariga salbiy ta'sir ko'rsatishi mumkinligini tushunib, o'z ishining ustasi bo'lgan travmatolog Pek Kan Xyukga murojaat qiladi. O'ziga bino qo'ygan va o'ziga ishongan jarroh anchagina bemorlar hayotini saqlab qoladi. Anglaganingizdek, serial taniqli travmatolog Pek Kan Xyuk haqida hikoya qiladi. U shifoxonada travmatologiya markazini tashkil qilish uchun kelgan. Hozirgacha travmatologiya bo'limida o'zining shifokorlari yo'q. Shu bois boshqa mutaxassislik shifokorlari navbatchilik qilishadi. Drama jang maydoniga aylangan shaharda mototsiklda shifoxonaga yo'l olgan qahramon bilan boshlanadi. Har qanday sharoitda bemorlarni qutqarishga tayyor bo'lgan ajoyib jarroh Pek Kan Xyuk bilan shu tarzda tanishasiz. U Koreyaga qaytib kelgach, travmatologiya bo'limi bemorlar hayoti uchun kurash maydoniga aylanadi. Oq libos kiyishga yoki o'zini jamoaga tanishtirishga ulgurmasidanoq, yangi bo'lim boshlig'i bemorning hayoti uchun kurashga kirishadi. Qisqasi, mazkur serial oq libosdagi qahramonlarning bemor hayoti uchun olib boradigan "kurashi" haqidagi, tomoshabinni o'ziga sehrlab oladigan drama.