Yolg'onchilik san'ati

Noyob san'at yo'nalishining shaydosi bo'lgan ikki makkor va kelishgan firibgarlar haqidagi juda qiziqarli ispan seriali. Ular boylarning ahmoqligidan pul ishlashga qaror qilishgan. Ispanlar odatda firibgarlar va o'g'rilar haqida filmlar suratga olishni yaxshi ko'rishadi. Aslida ham ular bu ishning uddasidan chiqa olishadi. “Yolg'onchilik san’ati” seriali ham so'zimiz isbotidir. Kata (Ximena Romo) — Madridda san'at tarixini o'rgangan meksikalik qiz. Ammo, u o'z diplomiga loyiq ish topa olmay, restoranda xizmatchi bo'lib ishlaydi. Aslida u san'atshunoslik bo'yicha doktor. Kelishgan Yago (Maxi Iglesias) esa inqirozga uchrash xavfi bo'lgan antiqa buyumlar sotiladigan do'konning egasi. Gap shundaki, u tajribasiz kolleksionerlarga katta pul evaziga noyob san'at asarlarining soxta nusxasini sotadi. Kata va Yago tasodifan uchrashib qolishadi va bu tanishuv kutilmagan burilishlarga sabab bo'ladi. Bir-birining iqtidorini payqagach, birgalikda tog'larni siljitishlari mumkinligini ham darhol anglashadi. Natijada ular umumiy "biznes"ni tashkil etishga qaror qilishadi. Kata va Yago "soxta rasmlar bilan savdo qilish ancha foydaliroq" degan qarorga kelishadi. Birinchi muvaffaqiyat bu firibgarlarni ishtiyoqini oshiradi. Ammo ular shug'ullanayotgan "biznes" nafaqat yaxshi pul, balki turli xil xavf-xatarlarga olib borishini ham tushunishadi. Biroq ularning bu uddaburonligi vaqti kelib, tuzoqqa aylanadi. Kata va Yago suvdan quruq chiqib keta olishadimi? Serial "bir epizod - bitta hikoya" tamoyili asosiga qurilmagan. Birinchi epizodda boshlangan "intri"ga hamma qismlarda davom etadi va har safar yangi bosqichga yetadi. Serialda jinoiy "intri"ga shu qadar mohirlik bilan yozilganki, tomoshabin uchun voqealar qanday yakun topishi noma'lumligicha qoladi.